हे,ते मुक्त करण्यापेक्षा

हे जग,सरळ द्वेषमुक्तच

करू,असे का म्हणत

नाही कोणी

कुठल्या

दिशेने गेले

म्हणजे हे घडवून

आणेल कोणी

आचारसरणी,विचारसरणी

एवढी करतात पायाभरणी

अशी कशी मग असते करणी

वरच्या इमारतीत स्थिरावल्यावर

त्यांना सोडून यांचे

यांना सोडून त्यांचे

धरतात लोक बोट

गोंधळल्यावर

गोंधळमुक्तच करण्याचे सारे

वहात का नाहीत वारे

स्वच्छ आभाळ,मोकळे तारे

कधीच का म्हणत नाही कोणी करू

किती बघायची

वाट कोणाची

आपले आपणच

हे सारे का न करू?

---श्रीपाद भालचंद्र जोशी